前幾日悶悶o地...諗住幫肥婆婆著衫仔影相...
點知....肥婆婆著完件衫之後...阿bee竟然唔認得佢...
我初初都唔知..因為我幫肥婆婆著完衫之後就去o左廁所..
出到o黎.....咦???點解阿bee條尾又粗又短o既??發生咩事呢??
之後企o係喥睇o左陣....原來阿bee係因為肥婆婆而咁樣o既...
肥婆婆行埋阿bee身...之後阿bee就好驚咁叫.....
我一見到咁就即刻幫肥婆婆除o左件衫仔...之後阿bee又無事...
哈哈...好搞笑...阿bee而家日日都走去聞o下件衫...
其實件衫買o左好耐..果陣諗住買俾阿bee著o架..點知佢一下子肥o左勁多..著唔落...
哈哈...

so far佢兩個而家都ok呀....都仲會打交o架...
不過只會係阿bee想訓覺而肥婆婆煩住佢果陣先會咁...

就快要搬屋喇...我諗緊點搬佢兩位大人過去朗屏呀...!!!~
我會搞好哂成間屋,最後先帶佢兩個過去...
但係呢....肥婆婆叫得咁勁....我驚到時保安會話我....
我想將兩位大人一齊放入同一個籠喥拎過去呀..因為坐的士只係幾分鐘o既事...
因為有一次帶阿bee去睇醫生...返到屋企阿bee唔認得肥婆婆..之後就勁打佢...
所以我驚如果分開兩個籠或者貓袋帶過去..阿bee又會再次唔認得肥婆婆呀...
咁辛苦先令佢兩個相處得好o左...我唔想因為搬屋搞到佢o地要重新相處過呀...
點算好呢???????????
如果放埋一齊拎過去...阿bee會唔會同佢打交呢???
如果阿bee又好似平時咁驚到縮埋一舊...我又驚肥婆婆係咁亂抓亂叫果陣整到阿bee...
真係十萬個煩.......

最近因為掛住搞結婚o既o野而少o左留o係屋企...
每次出o左街都會o係喥諗阿bee同肥婆婆點...
個心好想快d返屋企...但係要搞正經o野...無辦法啦...

每次出街前我都會開一盞暗d既燈,因為阿bee唔鍾意屋企無人又黑蚊蚊o既感覺...
以前我住屯門果陣...試過出門口唔記得開燈俾佢...好順手咁關o左燈...
雖然只係出o左街一陣...點知返到屋企阿bee嬲o左我...
所以自此之後我都唔敢再關哂屋企o既燈出街...

講開阿bee呢...佢最近瘦o左呀....
其實我仲o係喥諗緊....佢係因為身體有事而瘦o左...
定係因為佢呢排無食濕糧同其他o野...淨係食乾糧有關呢???
因為果陣已經夜晚了...而我又太緊張o既關係....
我打o左去三間診所喥問....因為我想個心安定d...所以打多兩間...
好彩....三間診所根據我講o既o野之後都話覺得阿bee無問題...只係我太緊張...
佢o地問o左我好多問題...又問阿bee有無飲多o左水...有無訓多o左覺...
又問我阿bee胃口有無唔同到...有無脾氣差o左之類...
好彩佢o地問o既問題....阿bee都無...所以可以放心喇!~
最近真係好多o野趕住要搞...當然....阿bee係最緊要o既...
但係醫生話無睇醫生o既必要....所以我一搞完之後為o左安全起見會帶佢做body check!~
同埋因為結婚要用好多錢....我之前收收埋埋諗住留俾阿bee既錢都用哂lu...

而肥婆婆呢...佢由朝到晚總之一見到我得閒就會要我同佢玩「拋公仔」...
點樣玩???即係好似同狗狗咁玩....我拋個公仔出去...之後佢用口執返o黎俾我...
肥婆婆真係呢....d行為越o黎越似隻狗狗......哈哈...點解會咁o架....?????

雖然我多o左出街...但係我o係屋企果陣都用盡哂時間去陪佢o地...
而家上網除非真係有o野搞...如果唔係我都唔會開電腦....專心d陪佢地嘛!~

阿bee同肥婆婆而家少o左打交喇....以前一日打十幾次...
而家通常最多都係一日打兩次.....除非我出o左街果陣佢o地打交啦...
不過我每次出街返o黎呢..佢o地都係訓緊覺o架...
呀...唔係訓緊覺...即係呢...訓緊覺果陣發現我返o黎,之後即刻起身果隻...
因為佢o地每次迎接我果陣呢....對眼都未開哂.....所以一定係訓緊覺....